У Кыргызстане паведамілі пра 37 загінулых у баях на мяжы з Таджыкістанам
Падчас узброеных сутыкненняў на мяжы Кыргызстана і Таджыкістана з кіргізскага боку загінула 37 чалавек, паведамляе агенцтва «Кабар» са спасылкай на прэс-службу МНС краіны.
Раней паведамлялася аб 24 загінулых і 129 параненых, колькасць апошніх, паводле ведамства, не павялічылася. У Баткенскім раёне, які мяжуе з Таджыкістанам, пачалася эвакуацыя, больш за 136 тысяч чалавек былі адпраўленыя сіламі МНС у больш бяспечныя раёны.
У сваю чаргу ўлады Таджыкістана афіцыйна пакуль што не назвалі колькасць загінулых або пацярпелых.
Канфлікт на мяжы Кыргызстана і Таджыкістана абвастрыўся ў ноч на 16 верасня.
На працягу сутак з пачатку эскалацыі бакі неаднаразова дамаўляліся запусціць у дзеянне рэжым спынення агню, у тым ліку пра гэта гаварылася на ўзроўні прэзідэнтаў дзвюх краін, аднак дамоўленасці зноў парушаліся.
