Мінпрам ужо не спадзяецца імпартазамясціць усё ды кажа, што і не хоча
9 верасня памочнік міністра прамысловасці Віталь Барчук на міжнародным форуме эканамічнага супрацоўніцтва, які прайшоў у Нацыянальнай бібліятэцы, расказаў пра перспектывы беларускага імпартазамяшчэння.
Паводле ацэнкі Мінпрама, большую частку тавараў прамежкавага попыту — запчастак, кампанентаў — у машынабудаванні можна вырабляць сіламі айчынных прадпрыемстваў. Узровень лакалізацыі ў галіне ўжо, маўляў, дасягнуў 68%.
Аднак на ўзроўні дырэктарата кампаній і ў міністэрстве ёсць разуменне, што
«імпартазамясціць усё раптоўна не атрымаецца, ды і не трэба»: гэта дорага, і ў высокатэхналагічных галінах не дасць станоўчага эканамічнага эфекту.
Таму вырашана, што імпартазамяшчацца на 100% прадпрыемствы будуць там, дзе стаіць пытанне нацыянальнай бяспекі. Як правіла, гэта тычыцца імпарту з «недружалюбных» краін, удакладніў Барчук.