У крымскай Керчы выбухі, працавала СПА
Пра тое, што ў горадзе на акупаваным расійскім паўвостраве працуюць сістэмы СПА, заявіў «дарадца кіраўніка Крыма» Алег Кручкоў.
«Папярэдне. У Керчы спрацавалі сістэмы СПА. Небяспекі для горада і (Крымскага) моста няма», — напісаў ён у сваім тэлеграм-канале.
Відавочцы паведамляюць пра два выбухі ў горадзе. Пра іх пішуць у мясцовых суполках «ВКонтакте», таксама інфармацыю перадалі на сайт «Крым. Реалии».
Па звестках з сацыяльных сетак, першыя гучныя выбухі «ўся Керч пачула» ў 20:42. У людзей задрыжалі шыбы, спрацавалі сірэны аўтамабіляў. Жыхары Керчы пачалі пісаць, што бачылі ў небе светлую дымавую паласу.
У 20:56 пачуўся яшчэ адзін магутны гук, падобны на выбух, і ў небе праз пару секундаў з'явілася вогненная ўспышка, якая знікла таксама праз некалькі секунд.
Таксама распаўсюджваецца відэа, пра якое сцвярджаюць, што яно нібыта знята таксама там.
Менавіта ў Керчы бярэ свой пачатак Керчанскі або Крымскі мост, які злучае акупаваны Крым з Расіяй.
