«Адкласці нейкую суму не атрымліваецца. Наогул ні капейкі!» Кухар дзіцячага садка распавяла пра свой заробак
Жыхарка горада Баранавічы, якая працуе кухарам у адным з дзіцячых садоў, расказала Intex-press, колькі зарабляе і як жыве на гэтыя грошы.
Жанчына працуе кухарам у дзіцячым садку больш за 20 гадоў. Яна кажа, што ведала пра невялікія заробкі кухараў, таму на вялікія грошы і не разлічвала. Калі жыла з мужам (цяпер яны ў разводзе) было нядрэнна — усё-ткі дзве зарплаты. Свой заробак яна выдаткоўвала па акалічнасцях.
Жанчына працуе на стаўку і атрымлівае на рукі каля 600 рублёў. «На такія грошы моцна не пашыкуеш», — кажа яна.
Перш за ўсё — камуналка
Звычайна заробак кухара размяркоўваецца так: перш за ўсё яна аплачвае камунальныя плацяжы. На гэта ідзе каля 160 рублёў — кватэра двухпакаёвая. Зімой выходзіць яшчэ больш.
Хатняга інтэрнэту няма, карыстаецца мабільным. Кожны месяц кладзе на мабільнік 30 рублёў.
Большая частка зарплаты ідзе на прадукты харчавання: на месяц — прыкладна 250 рублёў. «Прадукты я не закупляю вялікімі аб'ёмамі. Колькі мне адной трэба? Скончыліся крупы — пайшла і купіла пакет. На запас таксама не бяру. Які сэнс? Магу толькі крыху прыкупіць мяса ці курыцы, каб у маразілцы было хоць нешта на выпадак, калі нехта зойдзе ў госці. Ці ўнукаў пакарміць, калі яны прыязджаюць».
На працу на абед заўсёды бярэ з сабой бутэрброды: кухарам нельга выходзіць з прадпрыемства да заканчэння працоўнага дня. Таксама купляе на працу гарбату з кавай і якія-небудзь прысмакі.
Яшчэ адзін радок выдаткаў — праязны на аўтобус.
«Раней абнаўляла гардэроб кожны месяц»
Верхняе адзенне і абутак жанчына цяпер не купляе наогул. «Нашу тое, што ёсць».
Кажа, што калі жыла з мужам, то абнаўляла свой гардэроб кожны месяц, была магчымасць купіць рэчы добрай якасці: абутак скураны, адзенне з добрых тканін.
Цяпер яе абноўкі — гэта рэчы, якія часам «падкідвае» дачка, у іх адзін памер.
Рэдкім выпадкам, калі ўдаецца нейкую суму зэканоміць, радуе сябе дробнымі пакупкамі: недарагой маечкай, напрыклад.
Марыць пажыць на пенсіі
Прыкладна 50 рублёў ідзе на бытавую хімію, і касметыку, дэкаратыўную і для догляду.
Звычайна жанчына сочыць за акцыямі. Калі зусім усё дрэнна з фінансамі, можа ўзяць самы танны шампунь і бальзам.
Дэкаратыўную касметыку наогул купляе вельмі рэдка і толькі самую танную. «Духі ці туалетную ваду мне звычайна дораць дзеці».
Манікюр і педыкюр у мэтах эканоміі рабіць сама. Але абавязкова ходзіць да цырульніка на афарбоўку валасоў. Гэта абыходзіцца ў 50 рублёў.
Па кавярнях з сяброўкамі не ходзіць — дорага.
«Звычайна дзяўчаты самі да мяне прыходзяць і заўсёды з сабой нешта прыносяць. А гарбата і кава дома ёсць заўсёды».
«Адкласці нейкую суму з такой зарплатай цяпер не атрымліваецца. Наогул ні капейкі!» — кажа жанчына.
Калі з'яўляецца лішні рубель, то яна імкнецца яго адкласці — на дні нараджэння для ўнукаў. Іх двое.
Жанчына кажа, што ўсё ж спадзяваецца на лепшае.
«Хутка выйду на пенсію і спадзяваюся, што мне дадуць папрацаваць. Вось тады, можа, нешта назапашу і зраблю рамонт у кватэры. Я пра гэта мару ўжо даўно».
