З’явіліся відэа, на якіх відаць сляды высокадакладных удараў украінскай арміі па мосце ў Новай Кахоўцы
У Сеціве з'явіліся першыя кадры ўдару УСУ па мосце праз Дняпро ў раёне Кахоўскай гідраэлектрастанцыі. Гэта другі мост, які злучае расійскую групоўку ў Херсоне з левым берагам ракі. Звесткі пра ўдары па мосце пацвярджаюць і УСУ.
Мост каля Кахоўскай ГЭС у спраўным стане. Фота ілюстратыўнае
Раней паведамлялася, што мост у раёне Кахоўскай ГЭС непрыдатны для выкарыстання. Гэтая інфармацыя з'явілася ў свежай справаздачы аператыўнага камандавання «Поўдзень» УС Украіны.
«Між тым, наш агнявы кантроль транспартна-лагістычных шляхоў на часова акупаваных тэрыторыях Херсоншчыны прывёў да замацавання статусу моста ў раёне Кахоўскай ГЭС, як непрыдатнага для выкарыстання. Пападанне акуратнае, але дзейснае».
Раней армія Украіны неаднаразова наносіла ўдары па Антонаўскім мосце праз Дняпро ў Херсоне. Абодва масты выкарыстоўваліся для забеспячэння войскаў і горада.
