На мяжы Літвы і Беларусі назіраецца рост нелегальных мігрантаў, сітуацыя разгараецца
Як расказаў кіраўнік Службы аховы дзяржмяжы (САДМ) Рустам Любаеў, памежнікі ўжо звярнуліся па дапамогу да арміі і паліцыі, паведамляе Delfi.lt.
«У Літве сёння горача, каля 30 градусаў, горача і на мяжы Літвы, у плане бяспекі. Патокі выраслі, ужо некалькі тыдняў мы назіраем рост колькасці нелегалаў», — расказаў Любаеў.
Па яго словах, ужо быў устаноўлены рэкорд гэтага года — за суткі не пусцілі больш за 100 чалавек. Зараз у сярэднім у дзень фіксуецца каля 60-70 спробаў незаконнага перасячэння мяжы.
«Усё больш выпадкаў нелегальнага пранікнення фіксуем на поўначы, у Віленскім раёне, у Свянцянах, у Гадуцішках. Там не ўсюды ёсць загароды і сістэмы абароны, таму мігранты арганізавана спрабуюць прарвацца. Пакуль атрымоўваецца своечасова спыніць гэтыя спробы», — расказаў Любаеў.
Па-ранейшаму фіксуюцца выпадкі пашкоджання фізічнага бар'ера — гэта, па яго словах, робяць і мігранты, і беларускія памежнікі.
«З пачатку гэтага года зафіксавана каля 100 выпадкаў пашкоджання фізічнага бар'ера, у тым ліку выпадковыя (падчас будаўнічых работ) або пашкоджанні, нанесеныя жывёламі. У 70% загароды пашкоджваюць там, дзе няма сістэм назірання», — сказаў кіраўнік САДМ.
Паводле яго слоў, беларусы вучаць мігрантаў, як пераадолець бар'еры, якія месцы выбіраць, часам самі разразаюць калючы дрот і ўпускаюць мігрантаў на тэрыторыю Літвы.
«Работы па ўстаноўцы фізічнага бар'ера падыходзяць да канца (засталося каля 20 км). Да канца года плануем завяршыць устаноўку сістэм назірання», — працягнуў ён.
З-за напружанай абстаноўкі грамадзянам Літвы не рэкамендуюць ездзіць у Беларусь. Па словах Любаева, беларусы могуць абвінаваціць у перавозцы наркотыкаў, забраць пашпарт, сапсаваць яго, могуць затрымаць чалавека.
Ён назваў прычыны, па якіх грамадзяне Літвы ездзяць у Беларусь, і параіў не рабіць гэтага: «Большая частка тых, хто едзе ў Беларусь, кажуць, што едуць да сваякоў, блізкіх, знаёмых, можа, купіць нешта».
«Я ўсё ж лічу, што цяпер нашы грамадзяне могуць падарожнічаць па Еўропе, мабыць, варта звярнуць свой погляд на Заходнюю Еўропу, на дэмакратычныя краіны. А калі па розных прычынах — можа, каб наведаць знаёмых, родных — вырашаюць ехаць у Беларусь, трэба ўсё ўзважыць і адказна прымаць рашэнне, трэба разумець і ведаць, што магчымыя правакацыі, тады чалавеку складана будзе аказаць дапамогу, а можа нават немагчыма», — падкрэсліў Любаеў.
Усяго са жніўня 2021 года, калі было прынята рашэнне не ўпускаць нелегальных мігрантаў, на літоўскай мяжы спынілі амаль 11 700 нелегалаў.
