Махляры дураць людзей, «прадаючы» мэблю праз інстаграм
Літаральна за тыдзень у Пінскі ГАУС паступіла пяць заяў аб махлярстве з некалькіх гарадоў Брэсцкай вобласці. Ва ўсіх эпізодах фігуравала мэблевая інтэрнэт-крама mebel.store.by, акаўнт якой быў размешчаны ў інстаграме, піша «Вечерний Брест».
Крама mebel.store.by прапануе прэміяльную хатнюю і садовую мэблю па цэнах з велізарнай зніжкай, а таксама бясплатную дастаўку. На гэтыя салодкія прапановы многія і клююць.
Так у Пінску 22-гадовая дзяўчына, якая працуе бухгалтарам, захацела купіць дзіцячыя арэлі «Фантазія». Яна знайшла ў інстаграме акаўнт крамы. У яго было мноства падпісчыкаў і выдатныя водгукі задаволеных кліентаў. Ветлівы менеджар вычарпальна адказаў патэнцыйнай пакупніцы на ўсе пытанні пра тавар і расказаў пра розныя спосабы аплаты, зрабіўшы пры гэтым выгадную прапанову. Калі грошы пераводзіліся адным плацяжом з перадаплатай, то кліенту абяцалі значную зніжку і бясплатную дастаўку.
У выніку дзяўчына ўнесла 474 рублі ў якасці перадаплаты, аднак замоўленую мэблю так і не атрымала.
Падобныя гісторыі расказалі і іншыя пацярпелыя. Агульная сума шкоды ад дзеянняў «крамы» ўжо складае больш за 2000 рублёў.
