Кожны трэці расіянін лічыць, што Сонца круціцца вакол Зямлі
Усерасійскі цэнтр вывучэння грамадскай думкі (УЦВГМ) прадставіў вынікі апытання пра навуковыя памылкі расіян.
Так, кожны трэці расіянін перакананы, што Сонца круціцца вакол Зямлі (35%), за 15 гадоў паказчык вырас на 7 п.п.
У той жа час толькі 12% пагадзіліся з тым, што абарот вакол Сонца Зямля здзяйсняе за адзін месяц (2007 г. — 14%; 2011 г. — 20%).
Выказванне аб радыяцыі выклікала менш цяжкасцяў. Са сцвярджэннем, што радыеактыўнае малако можна зрабіць бяспечным, калі яго пракіпяціць, пагадзіліся толькі 7%. Гэта ў 2 разы менш, чым 15 гадоў таму (2007 г. — 14%).
У тое, што першабытныя людзі маглі гуляць побач з дыназаўрамі, верыць кожны пяты (21%), у 2007 г. такіх была траціна (30%).
Даволі высокая доля памылковых адказаў на пытанні пра ГМА. З меркаваннем, што прадукты з ГМА могуць выклікаць рак, пагадзіліся 44% расіян (— 23 п.п. да 2014 г.). На думку 32% апытаных, генна мадыфікаваныя прадукты змогуць перамагчы голад на зямлі (— 6 п. п. да 2014 г.).
Разам з тым, паведамляе УЦВГМ, агульны ўзровень навуковай пісьменнасці насельніцтва паступова расце. Даследаванне паказала, што невысокі ўзровень навуковай пісьменнасці маюць 21% расіян, сярэдні ўзровень — 44%, высокі ўзровень — 35%. У большай ступені на навуковую пісьменнасць уплываюць адукацыя, медыяспажыванне, узрост, памер населенага пункта, што лагічна і цалкам вытлумачальна.
Расіян з невысокім узроўнем навуковай пісьменнасці адрознівае старэйшы ўзрост (60+); актыўны прагляд тэлевізара (43%); пражыванне ў вёсцы (32%); адукацыя на ўзроўні сярэдняй і ніжэйшай (31-55%).
