Лучніца, якая з'ехала з Беларусі ў Польшчу, выйграла турнір
На гэтых выходных Карына Казлоўская, падпісантка ліста супраць гвалту, выйграла адразу тры залатыя медалі на этапе кубка гэтай краіны: у асабістым спаборніцтве, у жаночай камандзе і ў міксце. Акрамя таго, спартсменка пабіла свой асабісты рэкорд і два моладзевыя рэкорды Польшчы.
«У мяне з 2019 года не атрымлівалася абнавіць свой рэкорд у Беларусі — дзесьці праз стрэс, дзесьці праз ціск. У нас былі рознагалоссі з трэнерам і галоўным трэнерам. У Польшчы я адчула сябе значна вальней і лягчэй. У мяне павялічылася нагрузка, але трэніроўкі ідуць у асалоду. Я ізноў адчула, што гэта маё пакліканне», — падзялілася спартсменка з сайтам Tribuna.com.
Пасля такіх вынікаў растуць шанцы на хуткую змену спартыўнага грамадзянства Казлоўскай і ясней бачыцца перспектыва яе ўдзелу ў Алімпійскіх гульнях — 2024, міма якіх беларуская зборная з вялікай верагоднасцю пралятае.
