Расійскага хакеіста родам з Беларусі таксама могуць адправіць служыць у войска
Паводле інфармацыі тэлеграм-канала SHOT, ураджэнец Беларусі 25-гадовы Павел Карнавухаў, які з'яўляецца нападаючым ЦСКА, можа з'ехаць служыць на поўнач, як і галкіпер зборнай Расіі Іван Фядотаў. Нібыта ўзніклі пытанні да сапраўднасці вайсковага білета хакеіста, піша «Трыбуна».
Павел Карнавухаў. Фота: Зураб Джавахадзэ / ИЗВЕСТИЯ
Органы падазраюць, што ў 2017 годзе Карнавухаў купіў вайсковы білет праз знаёмага былога паліцэйскага Фарыта Самігуліна, якога затрымалі ў красавіку 2022 года за тое, што ён дапамагаў спартоўцам пазбегнуць службы ў войску.
Самігулін, які жыў ва Уфе, дапамагаў футбалістам аднайменнага клуба і гульцам хакейнага «Салавата Юлаева» пазбегнуць войска. Праўда, Карнавухаў гульцом уфімскай каманды ніколі не быў.
Мяркуецца, што вайсковы білет абышоўся нападаючаму ЦСКА ў 37 тысяч расійскіх рублёў (на дадзены момант гэта 650 даляраў).
Карнавухаў нарадзіўся і выгадаваўся ў Мінску, ён выхаванец сталічнай хакейнай школы «Юнацтва». У чэрвені 2020-га ён перападпісаў кантракт з ЦСКА на тры гады. Быў уладальнікам Кубка Гагарына і чэмпіёнам Расіі, сярэбраным прызёрам Алімпійскіх гульняў у Пекіне-2022 са зборнай Расіі.
