«Нам не патрэбна нічога наўзамен, акрамя павагі да нашага шляху». Ціханоўская звярнулася да Уладзіміра Зяленскага і ўрада Украіны
Ціханоўская зазначыла, што зараз нацыянальныя інтарэсы нашых народаў супадаюць у жаданні спыніць расейскую акупацыю абедзвюх краінаў, а беларусам узамен за актыўную падтрымку ўкраінскай арміі і народа Украіны не патрэбна нічога, акрамя ўзаемнай павагі.
«Час захоўваць адзінства насуперак агрэсару», — гаворыць Ціханоўская.
Яна згадала, што нядаўна Зяленскі казаў, што ўсе адказныя за ракеты з тэрыторыі Беларусі будуць пакараныя. Святлана Ціханоўская з ім пагадзілася, але дадала: «І гэта будуць Лукашэнка і яго памагатыя, але не ўвесь беларускі народ».
«Расійскія ракеты зноў ляцяць з тэрыторыі Беларусі ва Украіну. І беларусы, як і ўкраінцы, разумеюць, якія два дыктатары стаяць за гэтым. Але гэта не азначае, што мы не адчуваем асабісты боль за Кіеў, Харкаў і Крамянчуг…
Нашыя народы зараз падтрымліваюць адно аднаго, і задача палітыкаў — дапамагчы ім у гэтым. Не раз’яднацца тады, калі гэта дапаможа толькі ворагу. Беларусы зробяць усё магчымае, каб дапамагчы Украіне. Нам не патрэбна нічога наўзамен, акрамя павагі да нашага шляху. Павагі да нашага досведу і нашага права быць самімі сабой — беларусамі».
Напрыканцы Святлана Ціханоўская адзначыла пра выключную блізкасць двух народаў і, каб падкрэсліць гэта, нават параіла:
«Паважаны Прэзідэнт Зяленскі, калі ў наступны раз вы будзеце звяртацца да беларусаў, вы можаце не пераходзіць з украінскай мовы на расейскую».
