З Беларусі эвакуяваны дызайнер, які маляваў афішы маршаў 2020-га
Дызайнер Артур Вакараў эвакуяваны з Беларусі пры дапамозе фонду «Байсол».
Пра гэта паведаміў у сябе ў Фэйсбуку кіраўнік фонду Андрэй Стрыжак.
«Я рабіў і раблю так шмат, што нават не ведаю паводле якой справы 13 чэрвеня мяне выклікалі ў Следчы камітэт. Сказалі з’явіцца ў якасці сведкі па крымінальнай справе на Першамайскую, 7 (УСК па Мінску) да следчага такога. Па якой канкрэтна справе, адмовіліся адказаць», — казаў Артур.
Артур Вакараў — дызайнер, заснавальнік студыі дызайну «Адліга». Ён супрацоўнічаў з рознымі культурнымі і грамадскімі ўстановамі. Маляваў для «Радыё Свабода», «Арт-сядзібы», «Будзьма», «Еўрарадыё», «Лятучага ўніверсітэта». Таксама працаваў з вядомымі беларускімі музыкамі. Рабіў вокладкі для кніг Акудовіча, Мацкевіча, Разанава, Клінава, Марціновіча, Бабкова.
Падчас пратэстаў 2020-га маляваў афішы нядзельных Маршаў. Апошнія гады распрацоўваў кампаніі для Паўла Белавуса: святкаванне ўгодкаў БНР, «Годна», «Гоман», «Бусь Беларусь» і шмат іншых.
