Вызначылі цэнавы мінімум для продажу беларускага мяса за мяжу
Упершыню Беларуская ўніверсальная таварная біржа зафіксавала для мяса ялавічыны, якое ідзе на экспарт, цэнавы калідор з фіксаванай ніжняй мяжой, паведамляе БелТА. Гэта зроблена з-за вялікага попыту на гэтую прадукцыю.
З пачатку 2022 года, у параўнанні з аналагічным перыядам 2021 года, пастаўкі мяса праз таварную біржу павялічыліся ў 8 разоў. Больш за ўсё беларускай ялавічыны пастаўлена ў Расію, Казахстан і Польшчу.
Цяпер не пройдуць заяўкі на продаж са стартавай цаной ніжэй ўзроўню, устаноўленага цэнавым калідорам. Але адзінай цаны не будзе ўсё роўна, таму што яна залежыць і ад віду прадукцыі, і ад краіны прызначэння.
Напрыклад, пры продажы замарожанай ялавічыны ў Расію яе цана не можа быць ніжэйшай за 3,7 даляра (9,4 рубля) за кілаграм. Цяляціна ж абыйдзецца крыху даражэй — 4 даляры за кілаграм (10,2 рубля).
Адзначаецца, што ў далейшым, пры пэўных умовах, гэтыя цэнавыя парогі могуць змяніцца.
