Францыя, Італія, Германія і Румынія — за статус кандыдата ў Еўрасаюз для Украіны
Францыя, Германія, Італія і Румынія падтрымаюць неадкладнае наданне Украіне статусу кандыдата ў сябры ЕС. Гэтыя дзяржавы лічаць, што Украіне трэба даць такі статус неадкладна і без усялякіх умоваў. Пра гэта ў Кіеве заявіў прэзідэнт Францыі Эманюэль Макрон.
Падчас сустрэчы пяці лідараў дзяржаў у Кіеве. Фота Офіса прэзідэнта Украіны
Макрон наведаў Украіну разам з канцлерам Германіі Олафам Шольцам, прэм'ер-міністрам Італіі Марыё Драгі і прэзідэнтам Румыніі Клаўсам Ёханісам. Яны сустракаліся з прэзідэнтам Украіны Уладзімірам Зяленскім.
«Мы ўсе чацвёра падтрымліваем неадкладны статус кандыдата ў члены. Гэты статус будзе суправаджацца дарожнай картай, а таксама ўключаць прыняцце пад увагу сітуацыі на Балканах і прылеглых тэрыторыях, у прыватнасці ў Малдове», — заявіў Макрон.
Тым часам у еўрапейскай прэсе пішуць, што супраць тэрміновага надання Украіне статуса кандыдата выступаюць Нідэрланды і Данія. Яны лічаць, што Украіна пакуль не гатовая да гэтага. У прыватнасці, ёй яшчэ трэба шмат зрабіць у сферы будаўніцтва прававой дзяржавы і ў барацьбе з карупцыяй.
У той жа час прыхільнікі такога кроку мяркуюць, што ён будзе маральнай і палітычнай падтрымкай ахвяры расійскай агрэсіі.
