Грамадзянам Расіі і Беларусі забароняць удзельнічаць у камерцыйных кампаніях, важных для бяспекі Латвіі
Камісія латвійскага Сейма па абароне, унутраных справах і прадухіленні карупцыі ўхваліла ў канчатковым чытанні папраўкі да закона аб нацыянальнай бяспецы, якія прадугледжваюць забарону на істотны ўдзел капіталаў, якія належаць грамадзянам Расіі і Беларусі, у важных для бяспекі Латвіі кампаніях, піша delfi.lv.
Сейм Латвіі. Фота: DELFI.LV
Папраўкі прадугледжваюць, што грамадзяне Расіі і Беларусі або юрыдычныя асобы, заснаваныя ў гэтых краінах, не могуць набыць значную долю або вырашальнае права голасу ў важным з пункту гледжання нацыянальнай бяспекі прадпрыемстве.
Калі грамадзяне Расіі ці Беларусі ўжо маюць значны ўдзел ці вырашальны ўплыў у кампаніях, а таксама з'яўляюцца іх бенефіцыярамі, то з таго дня, як кампанія атрымае статус «значнай для нацыянальнай бяспекі», яны больш не змогуць карыстацца правам голасу ў ім.
Рашэнне прынята ў сувязі з уварваннем Расіі ва Украіну, а Беларусь, на думку латвійскіх палітыкаў, з'яўляецца саюзніцай Расіі і ў роўнай ступені адказная за агрэсію. Дэпутаты зыходзілі з таго, што Расія ўжо даўно выкарыстоўвае наяўныя ў яе распараджэнні рэсурсы і інфраструктуру, каб уплываць на прыняцце рашэнняў у краінах, якія выкарыстоўваюць яе прыродныя рэсурсы. Палітычны ўплыў у тым ліку аказваецца праз грамадзян Расіі і Беларусі або кампаніі, у тым ліку шляхам інвеставання ў крытычную інфраструктуру ці паслугі.
