НАК Украіны патрабуе не дапускаць да спаборніцтваў спартсменаў з Расіі і Беларусі
Прэзідэнт Нацыянальнага алімпійскага камітэта Украіны Сяргей Бубка патрабуе ад усіх міжнародных федэрацый выконваць рэкамендацыі Міжнароднага алімпійскага камітэта адносна адхілення расіян і беларусаў ад міжнародных спаборніцтваў.
Нагодай для гэтай заявы стаў допуск Міжнароднай федэрацыяй дзюдо камандаў Расіі і Беларусі да спаборніцтваў у мангольскім Улан-Батары, хоць і пад нейтральным сцягам. Бубка заявіў пра нязменнасць прынятага раней курсу на адхіленне расіян і беларусаў ад міжнародных спаборніцтваў.
«Нацыянальны алімпійскі камітэт Украіны цалкам падтрымлівае пазіцыю Міжнароднага алімпійскага камітэта, абвешчаную ў лютым, з таго часу нічога не змянілася. Выканаўчы камітэт МАК для абароны адзінства міжнародных спартыўных спаборніцтваў рэкамендаваў іх арганізатарам і міжнародным спартыўным федэрацыям не запрашаць да ўдзелу спартсменаў і афіцыйных асобаў з Расіі і Беларусі.
Гэтую пазіцыю на гэтым тыдні цалкам падтрымала Асацыяцыя летніх алімпійскіх відаў спорту. НАК Украіны патрабуе ад усіх міжнародных федэрацый выконваць згаданыя рэкамендацыі», — гаворыцца ў паведамленні НАК Украіны.
Пасля пачатку вайны ва Украіне Міжнародны алімпійскі камітэт 28 лютага заклікаў спартовыя арганізацыі адхіліць расійскіх і беларускіх спартсменаў ад удзелу ў міжнародных спаборніцтвах, але пакінуў магчымасць канчатковага выбару кіраўнічым органам асобных відаў спорту. Некаторыя федэрацыі адхілілі расійскіх і беларускіх спаборніцтваў цалкам, некаторыя — часткова і з агаворкамі.
