Чэхія прыме ў сябе 500 расіян і беларусаў, якія пераследуюцца ўладамі
Міністэрства замежных спраў Чэхіі апублікавала праграму «Грамадзянская супольнасць», у рамках якой краіна мае намер прыняць беларусаў і расіян, якія пераследуюцца ўладамі. Усяго чэхі гатовыя прыняць 500 чалавек.
Панарама Прагі. Фота: turizm.world
Як сказана ў паведамленні МЗС, мэта праграмы — дапамагчы актывістам пакінуць сваю краіну, калі ў ёй ім пагражае небяспека. Праграма будзе рэалізоўвацца на працягу года, прыём дакументаў ужо пачаўся (з 20 мая).
МЗС Чэхіі паведамляе, што ў праграму могуць быць уключаныя грамадзяне Расіі і Беларусі, якія з'яўляюцца грамадскімі актывістамі, праваабаронцамі, супрацоўнікамі незалежных медыя, навукоўцамі і іншымі прадстаўнікамі грамадзянскай супольнасці, якія пераследуюцца ўладамі на радзіме.
Асобы, якія адпавядаюць крытэрыям удзелу ў праграме, а таксама іх блізкія сваякі, змогуць звярнуцца з заявай у чэшскую амбасаду. Іх зварот у спрошчаным парадку разгледзяць на працягу месяца.
