Знайсці
09.06.2022 / 17:45РусŁacБел

Генштаб Украіны: Жытоміршчыну ўначы бамбілі з Беларусі

Намеснік начальніка Галоўнага аператыўнага ўпраўлення Генеральнага штаба Узброеных сіл Украіны Аляксей Громаў заявіў пра чарговы факт выкарыстання вайсковых аэрадромаў Беларусі для абстрэлаў украінскай тэрыторыі.

Наступствы абстрэлу Жытомірскай вобласці ў сакавіку 2022 года

«Прыкметаў фармавання на тэрыторыі Беларусі ўдарных, наступальных груповак не назіраем, але, напрыклад, сёння з аднаго з аэрадромаў Рэспублікі Беларусь праціўнік, Узброеныя сілы Расійскай Федэрацыі, падняў у паветра самалёты і нанёс ракетныя ўдары па тэрыторыі Украіны», — заявіў Аляксей Громаў 9 чэрвеня на брыфінгу ў Кіеве.

На просьбу карэспандэнта «Свабоды» ўдакладніць рэгіён абстрэлаў і аэрадромаў ён адказаў:

«1.15 ночы, Жытомірскі рэгіён, ракетны ўдар, крылатая ракета Х59. Два самалёты далучаныя з раёна Мазыра Гомельскай вобласці і аэрадрома «Баранавічы». Два самалёты Су-34 і адзін Су-30».

У той жа час Аляксей Громаў не паведаміў пра наступствы гэтага абстрэлу.

Раней ён заяўляў, што «з тэрыторыі Беларусі было 1211 вылетаў авіяцыі — больш за 20% ад агульнай колькасці — і 61 пуск крылатых ракет тыпу «Іскандэр» з мэтай паражэння аб’ектаў крытычнай інфраструктуры Украіны».

Кіраўнік Жытомірскай вобласці Віталь Бунечка на сваёй старонцы ў Фэйсбуку удакладніў, што ракета пацэліла ў шматпавярховік у Наваградзе-Валынскім. Пра загінулых ці пацярпелых ён не паведаміў.

На мінулым тыдні кіраўнік Жытомірскай абласной дзяржаўнай адміністрацыі Віталь Бунечка заявіў, што з пачатку расійскага ўварвання з тэрыторыі Беларусі былі акупаваныя 9 населеных пунктаў вобласці, а абстрэлы рэгіёна ажыццяўляліся як з Каспійскага мора, так і вайсковай авіяцыяй, якая дыслакавалася на тэрыторыі Беларусі.

«Мы штодзень нарошчваем абараназдольнасць, і калі нехта захоча зайсці з тэрыторыі Беларусі па зямлі, то мы зладзім такое апраметнае пекла, што ніхто сюды па зямлі дакладна не прыйдзе», — сказаў Віталь Бунечка журналістам падчас сваёй паездкі ў Оўруч.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера