Індыйская кампанія адкрыла рахунак у рупіях для аплаты беларускага калію. Але карыстацца ім не так проста
Кампанія Indian Potash Ltd (IPL) адкрыла рахунак у рупіях у расійскім Сбербанку, каб аплачваць пастаўкі беларускага калію. Пра гэта са спасылкай на ўласныя крыніцы піша агенцтва Reuters.
Рахунак быў адкрыты на пачатку лютага па запыце Беларускай калійнай кампаніі. Пасля гэтага на яго быў пералічаны першы плацеж на 23 мільёны даляраў у эквіваленце, аднак расійскі Сбербанк да гэтага часу не змог яго апрацаваць, вынікае з ліста IPL на адрас банка.
У дакуменце ад 23 мая гаворка ішла пра тое, што толькі «нязначная» сума ў рупіях была канвертаваная ў рублі для аплаты беларускага калію.
Паводле інфармацыі крыніцы Reuters, на завяршэнне транзакцыі паўплывалі ўведзеныя супраць Расіі санкцыі, а дакладней, адключэнне банкаў ад SWIFT. Па словах трох крыніц агенцтва, урад Індыі «будзе праяўляць асцярожнасць пры стварэнні любога механізму плацяжоў у рублях і рупіях да таго часу, пакуль ва Украіне ідуць жорсткія баі».
У снежні 2021 года ЗША ўвялі санкцыі супраць Беларускай калійнай кампаніі, а Еўрасаюз нядаўна таксама ўвёў абмежаванні супраць «Белкалія» і яго трэйдара БКК.