У Аўтуховіча і Разановіча падчас суда абвастрыліся праблемы са здароўем
У гродзенскай турме ўжо трэці тыдзень ідзе суд над фігурантамі «справы Аўтуховіча». «Вясна» паведамляе, што ў Мікалая Аўтуховіча і святара Сяргея Разановіча за гэты час пагоршылася здароўе.
Мікалай Аўтуховіч у клетцы на судзе
Вядома, што ў Сяргея Разановіча цукровы дыябет. Палітвязень ужо некалькі дзён скардзіцца на стан здароўя. У мінулую пятніцу, калі ў судзе перайшлі да допыту Сяргея, ён стаў адчуваць сябе вельмі дрэнна, таму перапынак у судзе абвясцілі раней, чым звычайна — у 16:00.
Таксама паведамляюць, што і ў Мікалая Аўтуховіча абвастрыліся праблемы са спінай, і ён увесь час адчувае моцны боль. Гэта звязана з клеткай-«стаканам», у якой яго штодзённа ўтрымліваюць амаль тры тыдні. У «стакане» амаль няма месца, а сядзець можна толькі на вузкай лаўцы.
