Сабака Патрон атрымаў прэмію на Канскім фестывалі

Славуты сабака Патрон, які працуе з украінскімі ратавальнікамі, дапамагаючы ім размініраваць Чарнігаўшчыну, атрымаў Канскую прэмію Palm Dog Award. Пра гэта паведаміла Дзяржаўная служба па надзвычайных сітуацыях Украіны ў Facebook.

Узнагарода, якую ўручылі Патрону. Фота: Facebook Дзяржкіно Украіны

«Сёння ў Канах яму прысуджаная прэмія «Пальмавы сабака» — гэта самая прэстыжная ў свеце кінапрэмія, якой узнагароджваюць чатырохлапых! А паколькі Патрон сапраўды стаў зоркай сусветнай кінахронікі за апошнія пару месяцаў, то журы аднагалосна вырашыла, што наш Хвастаты Піратэхнік годны «пальмавага» статусу», — гаворыцца ў паведамленні.

Дадаюць, што Патрон даведаўся пра свой зорны статус дыстанцыйна. Але пасля перамогі, магчыма, наведае Каны.

Ва ўкраінскім Дзяржкіно паведамілі, што прэмію Palm Dog уручаюць у Канах лепшаму сабаку, які зняўся ў фільме — удзельніку кінафестываля. Гэта штогадовае неафіцыйнае шоў узнагарод было пачата ў 2001 годзе журналістам Тобі Роўзам.

Патрона ўзнагародзілі адзнакай PalmDogManitarian, якая ўручаецца за сувязь паміж чалавецтвам і сабакамі. А галоўную ўзнагароду выйграў Брыт, серабрысты пудзель з фільма «Ваенны поні» Джыны Гамел і Райлі Кеа.