Сыну бізнэсоўца Вайцяховіча далі два гады калоніі за пратэсты
У Менску 16 траўня абвясцілі прысуд Іллі Вайцяховічу, якога судзілі за ўдзел у акцыі пратэсту, паведамляе Zerkalo.io на паставе сваёй інфармаванай крыніцы. Мужчыну ў студзені затрымалі на мяжы, калі ён ехаў на пахаванне бацькі.
Ілля Вайцяховіч. Фота: Snezhana Zelcha.
Суд прызнаў мужчыну вінаватым па частцы 1 артыкула 342 КК РБ («Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх») і прызначыў яму два гады калоніі.
Пра затрыманне Іллі Вайцяховіча СМІ паведамілі 16 студзеня — на наступны дзень пасля таго, як прайшло пахаванне кіраўніка бізнэс-інкубатара сельскага прадпрымальніцтва «Камарова» Эдуарда Вайцяховіча.
Крыніцы казалі, што Ілля якраз ехаў на пахаванне. Але так на іх і не трапіў — яго затрымалі на мяжы і даставілі на Акрэсціна. У СІЗА ён правёў чатыры месяцы.