У «генеральскім» доме адкрыўся «Еўраопт». Аўтэнтычныя драўляныя дзверы зніклі
У гістарычным будынку насупраць парка Чалюскінцаў запрацаваў «Еўраопт». Кампанія запэўнівае, што яна беражліва абышлася з фасадам «генеральскага дома». Але ў аматараў даўніны ёсць пытанне: зніклі драўляныя дзверы, звяртае ўвагу Onliner.
«Еўраопт» размясціўся ў даваенным будынку з калонамі на праспекце Незалежнасці, 91, прызнаным гісторыка-культурнай каштоўнасцю. Дом пачалі будаваць яшчэ да вайны — у 1939 годзе, у народзе яго называлі «генеральскім».
Крама зʼявілася ў гістарычным доме — каля ўваходу ў метро «Парк Чалюскінцаў». Час працы: з 9 да 22 гадзін.
Унутры звыклыя аддзелы: мясны, малочны, ёсць зона садавіны і гародніны, а таксама прылавак з хлебам і выпечкай. Ёсць выбар ежы навынас: сандвічы, гамбургеры, салаты, піца і сушы.
У прэс-рэлізах адзначаецца, што рамонт правялі беражліва, фасад захаваны. Аднак уважлівыя мінчане з гэтым не згодныя.
Напрыклад, карыстальніца Instagram заўважыла, што зніклі гістарычныя дзверы. На месца аўтэнтычных драўляных паставілі тыповыя пластыкавыя са шклом.
Onlíner запытаў каментарый у крамы, пакуль яго няма.
