ААН прагаласавала за расследаванне злачынстваў расійскіх вайскоўцаў ва Украіне
Рада правоў чалавека ААН пераважнай большасцю галасоў падтрымала рэзалюцыю аб пачатку расследавання меркаваных ваенных злачынстваў расійскіх войскаў ва Украіне, паведамляе Бі-бі-сі. Гаворка ідзе пра злачынствы, здзейсненыя ў пачатку вайны.
Выступаючы па відэасувязі з Кіева, намесніца міністра замежных спраў Украіны Эмінэ Джапарава сказала, што народ яе краіны перажыў «дзесяць тыдняў поўнага жаху». Вярхоўны камісар ААН па правах чалавека Мішэль Бачэлет заявіла, што за апошнія тыдні ў раёнах на поўнач ад Кіева было знойдзена каля тысячы целаў; частку гэтых людзей, мяркуючы па характары раненняў, пакаралі смерцю.
За расследаванне прагаласавалі 33 краіны-ўдзельніцы Рады, 12 устрымаліся. Адзінымі краінамі, што прагаласавалі супраць унесенай Украінай рэзалюцыі, былі Кітай і Эрытрэя.
Сама Расія ў Радзе правоў чалавека ААН не прадстаўленая, бо 7 красавіка Генеральная асамблея ААН прыпыніла яе ўдзел.
