Аўстрыя не будзе прызначаць новага амбасадара ў Беларусь
Вена плануе знізіць узровень дыпламатычнага прадстаўніцтва да часовага паверанага, паведаміў кіраўнік Народнага антыкрызіснага ўпраўлення Павел Латушка.
Будынак Міністэрства замежных спраў Аўстрыі ў Вене. Фота: flickr.com
Латушка падчас кансультацый з генеральным сакратаром МЗС Аўстрыі Петэрам Лаўнскі-Ціфенталем абмеркаваў крызісную сітуацыю ў рэгіёне і захады для прыцягнення рэжыму Лукашэнкі да адказнасці за рэпрэсіі ў дачыненні да беларусаў і саўдзел у вайне супраць Украіны.
Аўстрыйскі чыноўнік запэўніў Латушку, што Аўстрыя ўспрымае рэжым Лукашэнкі як саюзніка Расіі падчас агрэсіі ва Украіне і прынцыпова не мае з ім ніякіх кантактаў. Паніжэнне ўзроўню прадстаўніцтва ўкладаецца ў гэтую тэндэнцыю.
Амбасадарка Аўстрыі Алаіза Вергетэр ужо пакінула Беларусь: у яе скончылася дыпламатычная місія. У адрозненне ад амбасадара, часовы павераны не мусіць уручаць даверчыя граматы Лукашэнку.
