Фінляндыя і Швецыя могуць стаць членамі НАТА
Намеснік дзяржсакратара ЗША Вікторыя Нуланд падчас брыфінгу заявіла, што Штаты гатовыя абмяркоўваць з Фінляндыяй і Швецыяй пытанне іх уступлення ў НАТА, калі яны самі гэтага захочуць.
Цяпер Фінляндыя і Швецыя не з'яўляюцца членамі НАТА, але цесна супрацоўнічаюць з альянсам у статусе дзяржаў-партнёраў.
Але ў пачатку студзеня прэм'ер-міністр Фінляндыі Санна Марын заявіла, што краіна захоўвае за сабой магчымасць падачы заяўкі на ўступленне ў НАТА. «Мы павінны шанаваць гэту свабоду выбару і захоўваць яе, таму што яна тычыцца права кожнай краіны прымаць уласныя рашэнні ў галіне бяспекі», - сказала яна.
Нуланд адносна гэтага сказала:
«Мяркую, пяць адміністрацый ЗША, у якіх я працавала, заўсёды казалі Фінляндыі і Швецыі: «У любы час, калі вы захочаце абмеркаваць з намі сяброўства, мы гатовыя гэта зрабіць».
Калі абедзве краіны захочуць ўступіць у ваенны блок, іх будуць ацэньваць «па высокіх стандартах», стаўленне да іх будзе іншае, чым да краін з Усходняй Еўропы.
«Відавочна, што яны даўно стварылі стабільныя дэмакратыі, так што гэтая размова будзе крыху іншай, чым з краінамі, якія знаходзяцца ў стане пераходу да дэмакратычнай сістэмы і маюць справу з сур'ёзнымі праблемамі: карупцыяй, эканамічнымі рэформамі, стабільнасцю дэмакратыі», — адзначыла Нуланд.
