МЗС: Польскія дыпламаты арганізавалі спробу ўцёкаў з Беларусі падазраванага ў смяротным ДТЗ
Прэс-сакратар МЗС Анатоль Глаз паведаміў пра спробу польскага дыпламата вывезці падазраванага у смяротным ДТЗ, падчас якога загінулі дзве беларускі.
«Яму цалкам лагічна было часова абмежаванае права выезду з Рэспублікі Беларусь. Аднак 3 студзеня, каб пазбегнуць адказнасці, гэты грамадзянін паспрабаваў пакінуць нашу краіну і схавацца на тэрыторыі Польшчы, але быў затрыманы пагранічнікамі, — заявіў прэс-сакратар МЗС. — Намі цалкам дакладна ўстаноўлена, што спробу ўцёкаў ініцыявалі і арганізавалі супрацоўнікі генеральнага консульства Польшчы ў Брэсце. Па сутнасці супрацоўнікі польскага консульства наўмысна штурхалі свайго грамадзяніна на парушэнне беларускага заканадаўства».
Прэс-сакратар Дзяржпагранкамітэта Антон Бычкоўскі паведаміў падрабязнасці затрымання.
«Грамадзянін Польшчы 1999 года нараджэння разам са сваім бацькам вечарам 3 студзеня заехаў у пункт пропуску «Брэст» на рэйсавым аўтобусе «Санкт-Пецярбург — Варшава». Мужчыны мелі намер пакінуць краіну. Падчас памежнага кантролю было ўстаноўлена, што маладому чалавеку абмежаваны выезд з Беларусі.
Сам замежнік заявіў, што нібыта не ведае пра прычыны гэтай забароны. Аднак пазней высветлілася: ён з'яўляецца падазраваным па крымінальнай справе па факце ДТЗ са смяротным зыходам. Малады чалавек таксама расказаў, што з выездам у Польшчу яму дапамагалі супрацоўнікі польскага консульства ў Беларусі. Яны купілі яму білет да месца жыхарства ў Польшчы, прывезлі на аўтавакзал і правялі да аўтобуса».
Фота МУС таго самага ДТЗ
У выніку паляк не змог перасячы мяжу, яго перадалі Следчаму камітэту.
Прэс-сакратар МЗС Анатоль Глаз адзначыў, што такія дзеянні супрацоўнікаў Генеральнага консульства прама парушаюць шэраг палажэнняў Венскіх канвенцый па дыпламатычных і консульскіх зносінах.
«Яны парушаюць і беларускае заканадаўства», — адзначыў Глаз.
У эфіры АНТ стала вядома, што беларускае МЗС высылае супрацоўнікаў генконсульства. Каго менавіта, не называецца.
Між тым, дзяржаўныя СМІ ўжо апублікавалі імя і прозвішча грамадзяніна Польшчы, якога падазраюць у смяротным ДТЗ, а таксама фота з месца аварыі. Паведамляецца, што ў ёй загінулі дзве жыхаркі Брэста 31 і 35 год.