Праўладны аналітык абвінаваціў у міграцыйным крызісе на беларуска-польскай мяжы ўкраінцаў
Сярод затрыманых у Польшчы перавозчыкаў мігрантаў кідаюцца ў вочы грамадзяне Украіны. Такое меркаванне ў сваім Telegram-канале апублікаваў праўладны палітычны аналітык Юрый Шаўцоў.
«Праглядаю польскую афіцыйную зводку: дзве спробы прарыву за ноч па некалькі дзясяткаў чалавек кожная. Затрыманыя некалькі кур'ераў, якія спрабавалі вывезці бежанцаў, што прабраліся ў Польшчу, у Нямеччыну. Зноў некалькі грамадзян Украіны. Грамадзяне Украіны наогул кідаюцца ў вочы сярод затрыманых кур'ераў. Палякі іх бяруць практычна кожны дзень», — адзначыў каментатар.
Юрый Шаўцоў не выключае, што ўкраінская арганізаваная злачыннасць стала важным каналам трафіку бежанцаў ад беларускай мяжы ў Германію.
«У іх свой трафік ад украінскай мяжы праз Польшчу вельмі прыкметны. Калі яны падключыліся і да трафіку ад беларускай мяжы, гэта значыць, што ўкраінскія магчымасці ў Польшчы і Германіі для трафіку павінны зараз рэзка вырасці. Гэта значыць, што трэба звярнуць увагу на ўкраінска-польскую мяжу», — падкрэсліў праўладны палітычны каментатар.
