Брытанскі слоўнік Collins назваў слова 2021 года. І яно не звязанае з кавідам
Да 2021 года гэтае слова мала хто ведаў. А сёлета частата яго выкарыстання вырасла на 11000%. Чаму людзі так шмат пачалі яго ўжываць і пры чым тут магчымасць зарабіць вялікія грошы, не ўстаючы з-за камп'ютара, тлумачыць BBC.
Карціну Бэнксі спальваюць публічна, каб утварыць NFT. Скрын відэа Burnt Finance
NFT (non-fungible token) — «неўзаемазамяняльны токен» — гэта такія сертыфікаты, у якіх гаворыцца, што вы валодаеце арыгіналам віруснага відэа, ці мема, ці папулярнага твіта. Іх копіі можна прадаваць як творы мастацтва, але арыгінал твора пры гэтым абавязкова знішчаецца — каб стварыць лічбавы актыў.
Некаторыя сёлета сур’ёзна разбагацелі на сваіх NFT.
Дастаткова згадаць, як вясной вулічны мастак Бэнксі прадаў сваю карціну за 95 тысяч даляраў блакчэйн-кампаніі, а пасля аблічбоўкі арыгінала карціны кампанія спаліла яе ў жывым эфіры, каб стварыць віртуальны актыў. Атрыманы такім чынам NFT-токен быў прададзены на аўкцыёне значна даражэй за арыгінал карціны.
Разам з NFT у шорт-ліст увайшлі два іншыя словы, звязаныя з тэндэнцыяй аблічбоўваць рэчаіснасць — crypto (скарот ад крыптавалюты) і metaverse (трохвымерны віртуальны сусвет).
Рэдактары слоўніка таксама адзначылі тры выразы, звязаныя з пандэміяй: double-vaxxed (той, хто атрымаў дзве дозы вакцыны), pingdemic (масавая немагчымасць хадзіць на працу, паколькі ўсе супрацоўнікі вымушаныя выходзіць на самаізаляцыю пасля кантакту з тымі, у каго пазней выявілі каронавірус — такую інфармацыю людзі атрымлівалі праз спецыяльныя паведамленні на тэлефон — пінгі), hybrid working (рэжым, калі супрацоўнікі праводзяць у офісе толькі частку працоўнага часу).
У 2020 годзе укладальнікі Collins English Dictionary словам года назвалі lockdown (лакдаўн).
