«Ён сам вырашае»: Пяскоў пракаментаваў словы Лукашэнкі наконт дыялогу з Ціханоўскай
Аляксандр Лукашэнка сам вырашае, з кім весці дыялог, але наўрад ці яго суразмоўцай будзе Святлана Ціханоўская. Такое меркаванне выказаў прэс-сакратар Пуціна Дзмітрый Пяскоў, каментуючы выказванні Лукашэнкі наконт магчымасці дыялогу з Ціханоўскай, піша ТАСС.
БелТА
Лукашэнка раней заявіў у інтэрв'ю Бі-бі-сі, што ён прыступіць да дыялогу з апазіцыяй, у прыватнасці, з яе лідаркай Ціханоўскай, калі прэзідэнт Расіі Уладзімір Пуцін з Аляксеем Навальным «сядуць за стол перамоваў». Лукашэнка падкрэсліў, што Навальны для Пуціна не апазіцыянер, а здраднік інтарэсам Расіі.
«Па ўсёй бачнасці, Аляксандр Рыгоравіч вельмі маляўніча такім чынам заявіў аб катэгарычнай немагчымасці і адсутнасці наогул якой-небудзь тэмы для размовы са спадарыняй Ціханоўскай. Менавіта так, напэўна, гэта трэба трактаваць», - выказаў меркаванне прадстаўнік Крамля.
«У астатнім прэзідэнт Беларусі сам вырашае, з кім яму весці дыялог і для чаго», — падкрэсліў Пяскоў.