Знайсці
20.11.2021 / 16:05РусŁacБел

Што лепш: шпацыр ці паход? Адказ не такі відавочны

Хадзьба, бадай, стала самай папулярнай фізічнай актыўнасцю сёння. Яна дае выдатную нагрузку на сэрца, трэніруе лёгкія, дапамагае скінуць лішнюю вагу і мае яшчэ тузін плюсаў. Тым не менш усё больш людзей аддаюць перавагу не хадзьбе, а пешаму турызму, ці, папросту, паходам. Ці насамрэч хадзьба і пешы турызм так моцна адрозніваюцца між сабой? І галоўнае — што з іх больш карыснае для вас, разбіралася CNN.

Фота з Pixabay.com

Хадзьбой людзі часцей займаюцца ў горадзе ці прыгарадзе або на бегавой дарожцы. А ў паходы выбіраюцца на прыроду.

Пры хадзьбе мы рухаемся па больш-менш гладкай паверхні, а вось у паходах нам трэба то падымацца на ўзвышэнні, то спускацца, ісці па камянях ці пераскокваць яміны.

Некаторыя дактары лічаць, што абодва гэтыя віды фізічнай актыўнасці аднолькава карысныя. Што з гэтага больш пасуе вам — залежыць ад вашых мэт.

Калі вашая задача — спаліць калорыі

Каб скінуць больш калорый за карацейшы час, вам лепш ісці ў паход, а не на шпацыр.

Колькі вы зможаце спаліць калорый за паход, залежыць ад вашай вагі, складанасці маршрута і цяжкасці пляцака. Таксама істотна, у якое надвор’е вы выпраўляецеся, колькі вам год, мужчына вы ці жанчына.

Прайшоўшы каля 1,5 км на звычайным шпацыры, вы спаліце прыблізна 100 калорый, а ў паходзе за такую ж адлегласць вы страціце ў два разы больш. Калі ж вы возьмеце яшчэ і цяжкі пляцак і пойдзеце ў мясцовасць з крутымі пад’ёмамі, за гадзіну вы зможаце страціць і 500 калорый.

Калі ў вас не так шмат часу на трэніроўку

Часта турыстычныя сцежкі, распрацаваныя для пешага турызму, знаходзяцца далёка ад горада. Калі ў вас няма часу дабірацца да такой сцежкі — ідзіце ў гарадскі паход, толькі не забудзьце начапіць пляцак і выбраць раёнчык з узгоркамі. Калі ў вас ёсць палкі для скандынаўскай хадзьбы і вы будзеце рухацца хутка, вы спаліце яшчэ больш дадатковых калорый.

Калі вас цікавіць больш бюджэтны варыянт трэніровак

Тады, вядома, хадзьба. Лёгкая вопратка, зручны абутак — і ўсё, у прынцыпе, што трэба на шпацыры.

Для паходаў жа трэба парупіцца пра шмат дробязяў для зручнасці: бутэлечка для вады, перакус, магчыма, палкі, абутак (лепш горны), вопратка, якая дыхае. І ўсё гэта грошы. Каб дабрацца да турыстычнай сцежкі, вы таксама заплаціце за паліва.

Калі вас хвалюе бяспека

Хадзьба, натуральна, бяспечнейшы варыянт. У горадзе на шпацыры вы наўрад ці сустрэнеце дзікіх жывёл. Калі раптам лупане дождж, вы заўжды зможаце схавацца ў кавярню ці выклікаць таксі. Ну і замарыцца так моцна, як у паходзе, вы не заморыцеся — а значыць, будзеце больш пільныя і энергічныя.

Калі трэба зняць стрэс

У прынцыпе, любая фізічная актыўнасць добра здымае стрэс і трывожнасць, а таксама павышае ўвагу і канцэнтрацыю. Але паход яшчэ дорыць адчуванне спакою. Бо ў паходзе вы сутыкаецеся з прыродай.

Нават кароткія шпацыры па парку ці проста па горадзе — гэта нашмат лепш, чым хадзьба ў трэнажорнай залі.

Калі ж вы маеце магчымасць выехаць у лес — едзьце.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера