Украінскія памежнікі не пусцілі 15 «турыстаў» з Блізкага Усходу, якія пасля наведвання Гарадзеншчыны ехалі ў Львоў
Памежная служба Украіны прадухіліла спробу замежных грамадзян з Блізкага Усходу трапіць ва Украіну з Беларусі.
15 замежнікаў з Блізкага Усходу, якія накіроўваліся рэйсавым аўтобусам з Мінска, спрабавалі перасекчы мяжу ў пункце пропуску на Чарнігаўшчыне 18 лістапада.
Яны сцвярджалі, што едуць ва Украіну для турызму.
Аднак памежнікі высветлілі, што замежнікі, сярод якіх чацвёра падлеткаў, некалькі тыдняў таму прыляцелі ў сталіцу Беларусі і тут жа накіраваліся ў Гродзенскую вобласць.
Агледзеўшы «славутасці» на захадзе Беларусі, вандроўцы вырашылі зазірнуць яшчэ і ва Украіну. Спадарожнікі запэўнівалі, што ва Украіне іх больш за ўсё цікавяць пейзажы Львоўшчыны.
Менавіта са Львова яны быццам бы планавалі вярнуцца дадому. Аднак такі турыстычны маршрут не пераканаў праваахоўнікаў.
Большасць з названых асоб мелі пашпарты, выдадзеныя практычна ў адзін перыяд, у верасні — кастрычніку гэтага года.
Украінскія памежнікі прынялі рашэнне не прапускаць і вярнуць падарожнікаў у Беларусь.
