У ЗША пачалі вакцынаваць дзяцей 5-11 год ад кавіду
У большасці развітых краін можна вакцынаваць ад каранавіруса падлеткаў ад 12 год.
Пачынаючы з серады, 3 лістапада, у ЗША, адной з першых краін у свеце, пачалі прышчапляць і дзяцей ва ўзросце 5-11 год.
Рашэнне было прынята Цэнтрам па кантролю і прафілактыцы захворванняў ЗША ў аўторак, 2 лістапада. Цэнтр рэкамендаваў вакцыну Pfizer/BioNTech для шырокага выкарыстання сярод дзяцей малодшага школьнага ўзросту. Дзіцячая доза Pfizer складае адну трэць ад дарослай, і прышчапляцца трэба будзе гэтак жа, як і дарослым, два разы, з перапынкам у 21 дзень.
У той жа час, Сусветная арганізацыя здароўя не задаволеная такім рашэннем: вакцыны пакуль не хапае бедным краінам, каб прышчапіць найбольш уразлівыя групы насельніцтва.
У Еўропе прышчапляць малодшых школьнікаў пакуль нельга.
