Выставачны праект да 100-годдзя Віленскага беларускага музея імя Луцкевіча распачаўся ў Нацыянальным мастацкім музеі
Сто год таму Іван Луцкевіч перадаў сваю ўласную калекцыю старажытнасцяў Беларускаму навуковаму таварыству ў Вільні — так і пачаўся першы беларускі нацыянальны музей.
Ён існаваў з 1921 па 1945 год і за кароткі час свайго існавання стаў цэнтрам беларускага культурнага жыцця Вільні і ўсёй Заходняй Беларусі, гуртаваў вакол сябе дзеячаў нацыянальнага адраджэння, у ім арганізоўваліся не толькі экскурсіі, музей таксама выступаў пляцоўкай для правядзення лекцый, творчых сустрэч і адукацыйных праграм.
Пасля ліквідацыі музея калекцыі падзялілі паміж Беларуссю і Літвой. Найбольшая і самая каштоўная частка музейных рэчаў засталася ў Літве, у Беларусь патрапілі прадметы, якія, на думку ліквідацыйнай камісіі, мелі непасрэднае дачыненне да нашай культуры.
Цяпер усе экспанаты з беларускіх сховішчаў сабраныя ў маштабным праекце — не прапусціце. Выстава будзе працаваць да 12 снежня.