Для абітурыентаў Акадэміі кіравання ўвядуць сумоўе, каб адбіраць «сапраўдных патрыётаў»
Рэктар Акадэміі кіравання Вячаслаў Даніловіч у эфіры YouTube-канала «Галоўны. Тур» распавёў, як менавіта з ліку абітурыентаў будуць адбіраць патрыётаў, паведамляе БелТА.
«Мы плануем, што па новых правілах прыёму ў Акадэмію кіравання можна будзе паступаць маючы рэкамендацыі з апошняга месца вучобы, службы альбо працы, а таксама ад мясцовых органаў улады. Акрамя таго, уводзіцца прафесійна-псіхалагічнае сумоўе. Перад пачаткам уступнай кампаніі камісія Акадэміі кіравання зможа на свае вочы ўбачыць абітурыента, які прыходзіць, патэсціраваць яго пэўным чынам. А далей уступаюць у сілу ўжо вынікі ЦТ, ідзе агульны конкурс», — распавёў Вячаслаў Даніловіч.
У ВНУ разлічваюць з дапамогай гэтых рычагоў забяспечыць, каб у Акадэмію кіравання «прыходзілі сапраўдныя патрыёты, людзі з пэўнымі задаткамі, якія неабходныя ў кіраўнічай сферы».
