Ці патрэбна вакцынацыя людзям з паніжаным або прыгнечаным імунітэтам?

Людзі са зніжаным або прыгнечаным імунітэтам павінны быць вакцынаваны ў першую чаргу, бо ўваходзяць у групу рызыкі і часцей за іншых пераносяць каранавірус у цяжкай форме, аж да смяротнага выніку.

Такім меркаваннем падзяліўся доктар-інфекцыяніст рэктар Гомельскага дзяржаўнага медыцынскага ўніверсітэта доктар медыцынскіх навук дацэнт Ігар Стома, паведамляюць Мінск-навіны.

Ігар Стома падкрэслівае, што даныя аб першай хвалі каранавіруса ў Італіі паказалі: кожны пяты памерлы ад інфекцыі чалавек меў анкалогію той ці іншай формы. Але, калі б на момант заражэння яны знаходзіліся пад абаронай вакцыны, магчыма, іх удалося б вылечыць, а пазней — перавесці анказахворванне ў стадыю рэмісіі.

На падставе гэтых звестак можна сцвярджаць, што людзі са зніжаным імунітэтам павінны быць прышчэплены ў першую чаргу, лічыць эксперт.

— Вядома, хачу падкрэсліць, рашэнне аб тэрмінах вакцынацыі павінна прымацца на кансіліуме пры ўдзеле профільных спецыялістаў, якія вядуць гэтага пацыента. Гэта не самастойнае рашэнне, яно павінна быць абгрунтавана спецыялістамі адпаведнага профілю — удакладняе медык.

Пры гэтым зрабіць прышчэпку людзям з імунасупрэсіяй эксперт вельмі рэкамендуе. Паводле яго слоў, эфект ад вакцыны хоць і можа быць некалькі зніжаны з-за асаблівасцяў працы іх арганізма, але не даведзены да нуля.