У Беларусі ліквідавалі апошнюю зарэгістраваную праваабарончую арганізацыю
«Прававую ініцыятыву» ўлады афіцыйна закрылі 5 кастрычніка.
У аўторак адбылося закрыццё ў Вярхоўным судзе «Прававой ініцыятывы», апошняй зарэгістраванай праваабарончай арганізацыі. Першы раз суд у ліквідацыі прызначылі яшчэ 19 ліпеня. Цяпер арганізацыю афіцыйна ліквідавалі адпаведнай судовай пастановай, піша «Радыё Свабода».
«Прававая ініцыятыва» — некамерцыйная недзяржаўная арганізацыя, якая займаецца абаронай правоў чалавека. Створана ў 1996 годзе.
16 ліпеня па месцы рэгістрацыі старшыні аб’яднання Вікторыі Фёдаравай адбыўся ператрус у рамках крымінальнай справы аб масавых беспарадках. Сама кіраўніца ад сёлетняга сакавіка вымушана знаходзіцца за межамі Беларусі.
З сярэдзіны ліпеня ў Беларусі адбываецца масавая ліквідацыя недзяржаўных арганізацыяў. Геаграфія зліквідаваных уладамі ўстаноў ахапіла практычна ўсю Беларусь.
