Жанчына з Іўя за мяжу не тэлефанавала, але з рахунка спісалася 200 рублёў
Жыхарка Іўеўскага раёна атрымала SMS-паведамленне ад аператара сотавай сувязі, што на яе рахунку ўтварылася запазычанасць 200 рублёў. Каб растлумачыць сітуацыю, жанчына звярнулася да аператара і папрасіла зрабіць дэталізацыю званкоў. Высветлілася, што з гэтага нумара тэлефанавалі за мяжу.
sudexpert.gov.by
Аднак, па словах жанчыны, на замежныя нумары яна не тэлефанавала. Больш таго, у журнале выклікаў яны не адлюстраваны. Яна звярнулася ў міліцыю.
Там прызначылі судовую камп'ютарна-тэхнічную экспертызу ў Дзяржкамітэце судовых экспертыз па Гродзенскай вобласці.
Высветлілася, у мабільным тэлефоне былі шкоднасныя файлы. Судовы эксперт налічыў іх больш за 80. Некаторыя са шкоднасных праграм, якія былі выяўленыя на мабільным тэлефоне, маглі цалкам кіраваць усталяванымі дадаткамі.
У прыватнасці, ажыццяўляць званкі без ведама ўладальніка, адпраўляць паведамленні, кіраваць банкаўскімі рахункамі, «прывязанымі» да тэлефона і г. д.
Пры якіх абставінах шкоднасныя праграмы патрапілі ў прыладу, цяжка вызначыць. Магчыма, жанчына ўсталёўвала нейкую праграму, а яна ўтрымоўвала шкоднасны код, або пацярпелая перайшла па сумнеўнай спасылцы і так трапіла на заражаны файл.
