58% беларускіх стартапаў з'ехалі з Беларусі: Imaguru апублікаваў вынікі апытання
Экасістэма стартапаў Беларусі перажывае глыбокі крызіс, а некаторыя яго наступствы ўжо непапраўныя або для збавення ад іх спатрэбяцца дзесяцігоддзі. Да такіх высноў прыйшлі эксперты Imaguru ў справаздачы аб жыцці беларускіх стартапаў пасля прэзідэнцкай электаральнай кампаніі 2020 года, як паведамляе belbiz.
Эксперты правялі апытанне беларускіх стартапаў: пыталіся пра іх дзейнасць, выніковасць і перспектывы ва ўмовах палітычнага і эканамічнага крызісу ў Беларусі, выкліканага выбарамі мінулага года і падзеямі, звязанымі з імі.
Для аб'екта даследавання была ўзятая база даных стартап-хаба Imaguru і акселератара TechMinsk. Апытвалі стартапы, у якіх хаця б адзін з заснавальнікаў з дамінуючай доляй — беларус. На 41 пытанне анкеты адказалі прадстаўнікі 220 стартапаў.
Асноўныя высновы даследавання наступныя:
— Палітычны крызіс у Беларусі негатыўна паўплываў на працу ўсяго беларускага бізнэсу і пераважнай большасці стартапаў у прыватнасці. Мінск перастаў быць цэнтрам экасістэмы. Каманды працуюць дыстанцыйна.
— Сярод найбольш частых наступстваў палітычнага крызісу стартапы адзначаюць рэлакацыю бізнэсу (52%), змяненне планаў і дадатковыя выдаткі (45%), пагаршэнне доступу да знешняга фінансавання (32%), пагрозы развіццю бізнэсу (28,5%), зніжэнне эфектыўнасці працы каманды (27%).
— 58% беларускіх стартапаў з'ехалі з Беларусі і толькі 4% адзначылі, што не бачаць прычын для пераезду, бо іх усё задавальняе.
— Чвэрць заснавальнікаў не плануюць вяртацца ў Беларусь. Для астатніх асноўнай умовай вяртання з'яўляюцца дэмакратычныя перамены.
— 70% стартапаў лічаць, што наступствы крызісу працягнуцца і пасля 2023 года.
— Большасць беларускіх стартапаў маюць кампаніі за мяжой. Кожны трэці стартап падняў інвестыцыі ў крызісны перыяд.
Толькі 3% стартапаў плануюць прыцягваць грошы ў наступным годзе ў беларускіх інвестараў.
Каментуючы працэсы, заснавальнік групы кампаній Belbiz і стартап-хаба Imaguru Таццяна Марыніч называе рэлакацыю прадстаўнікоў тэхнічных стартапаў галоўным трэндам апошняга года ў індустрыі.
«Гэта дрэнна для эканомікі тут і цяпер. Для саміх стартапаў гэта вялікія змены, змена ранейшых звычак побыту і працы, а значыць, і эфектыўнай працы каманды. З іншага боку, гэта каласальная школа бізнэсу і жыцця, якую праходзяць сёння нашы маладыя людзі. Я ўпэўненая, што вельмі многія стануць расці нават хутчэй і якасней, чым калі б яны засталіся ў Беларусі. Многія з іх вернуцца, калі ў Беларусі адбудуцца дэмакратычныя змены. Вернуцца з набытым вопытам, інвестыцыямі, міжнароднымі бізнэс-партнёрамі. Гэта будзе каласальны ўклад у новую беларускую эканоміку. Так, існуюць сур'ёзныя рызыкі, што вернуцца не ўсе. Каб мінімізаваць гэтую рызыку, важна выбудоўваць альтэрнатыўную інфраструктуру падтрымкі беларускіх стартапаў за мяжой, працягваючы будаваць супольнасць анлайн і развіваючы такія хабы, як Imaguru, у тых краінах, дзе больш за ўсё беларускіх IT-спецыялістаў.
PandaDoc ацэнены мінімум у $1 млрд — цяпер гэта кампанія-аднарог