Літва стварыла магчымасць прасіць прытулку ў пасольстве краіны ў Мінску
З серады Літва стварыла магчымасць прасіць прытулку ў пасольстве краіны ў Беларусі. Гэта прадугледжана ва ўказе, падпісаным у аўторак міністрам абароны Арвідасам Анушаўскасам, які замяшчае кіраўніка МЗС, паведамляе Delfi.lt.
Фота Пасольства Літвы ў Беларусі
Да гэтага часу літоўскія памежнікі заклікалі мігрантаў, якія спрабуюць нелегальна перасекчы мяжу з Беларуссю, прасіць прытулку на кантрольных памежных пастах.
«Прашэнні замежных грамадзян аб прадастаўленні прытулку могуць падавацца ў пасольстве Літоўскай Рэспублікі ў Рэспубліцы Беларусь», — гаворыцца ў дакуменце, які ўступіў у сілу ў сераду.
Магчымасць прасіць прытулку ў дыпламатычных прадстаўніцтвах Літвы прадугледжана ў прынятых 10 жніўня папраўках да закона аб прававым статусе замежнікаў, аднак у рэчаіснасці гэта не прымянялася, пакуль МЗС не прыняў заканадаўчы акт па рэалізацыі гэтага палажэння.
Раней віцэ-міністр унутраных спраў Арнолдас Абрамавічус заяўляў, што мігранты, якіх разварочваюць на мяжы, ні разу не падавалі прашэнні аб прытулку на КПП, бо ў большасці з іх няма дакументаў, якія пацвярджаюць асобу, і па гэтай прычыне беларускія службы не прапускаюць іх праз свае пункты.
