Знайсці
08.09.2021 / 19:47РусŁacБел

Сілавікі разагналі летнік ёгаў пад Барысавам

5 верасня ў лагеры пад Барысавам сілавікі разагналі сход людзей, якія практыкуюць віпасану (гэта асаблівы від медытацыі). Пра гэта «Медыязоне» распавёў адзін з удзельнікаў, які пажадаў застацца ананімным.

Паводле яго слоў, усяго на мерапрыемстве пад Барысавам было каля 70 чалавек, у тым ліку замежнікі. Яно пачалося 3 верасня і павінна было працягвацца дзесяць дзён.

«Раніцай мы медытавалі, і я хацеў пайсці ў пакой, каб працягнуць медытацыю па дазволе настаўніка там, але, дайшоўшы да дзвярэй, убачыў двух чалавек у цывільным і кепках са сцягам Беларусі, чырвона-зялёным. За імі былі прыкладна 10—15 [чалавек] у форме АМАПа з дубінкамі, якія ішлі проста на нас. Дзяўчыну адну адштурхнулі ад дзвярэй, і яна ўпала трохі», — распавёў суразмоўца «Медыязоны».

Усіх удзельнікаў амапаўцы сабралі ў адной зале, а пасля «выклікалі арганізатараў і доўга гаварылі з імі».

«Супрацоўнікі прыходзілі і рабілі фатаграфіі залы і ўсіх нас. Некаторыя хацелі схадзіць у прыбіральню, бо нас трымалі дзесьці 1,5-2 гадзіны, але выходзіць нельга было, нават калі вельмі хацелася. Пасля гэтага арганізатараў і замежных грамадзян павезлі ў РАУС, дзе іх сталі распытваць пра тое, што адбываецца і што яны ўсё робяць тут. Нас адпусцілі прыкладна праз 10 хвілін, калі павезлі арганізатараў і замежнікаў».

Па словах удзельніка, сітуацыя ў лагеры доўжылася каля дзвюх гадзін. Яшчэ прыкладна столькі ж арганізатары і замежнікі правялі ў аддзеле міліцыі.

«Пасля РАУС замежнікаў і арганізатараў прывезлі назад. Усім намякнулі, што трэба пакінуць лагер на працягу сутак, інакш яны зноў прыйдуць і ўжо будуць па-іншаму гаварыць. А пазней змянілі патрабаванні і сказалі, што калі мы не хочам праблем ужо сёння, то з'ехаць трэба на працягу 3-х гадзін», — распавёў суразмоўца.

Ён дадаў, што арганізатары «былі ў шоку», «папрасілі прабачэння і хутка дапамаглі ўсім з'ехаць». Па інфармацыі суразмоўцы «Медыязоны», на арганізатараў склалі пратаколы па артыкуле аб парушэнні парадку арганізацыі або правядзення масавых мерапрыемстваў (артыкулы 24.23 КаАП).

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера