Талібы разагналі стрэламі тысячную дэманстрацыю ў Кабуле
Афганістан не здаецца. Жыхары краіны выходзяць з пратэстамі за правы жанчын і супраць уплыву Пакістана.
Жыхары Кабула бягуць з масавай дэманстрацыі 7 верасня. Фота New York Times.
7 верасня ў сталіцы Афганістана Кабуле прайшла масавая дэманстрацыя. Не менш за тысячу афганцаў выйшлі з пратэстам, каб заклікаць да выконвання правоў жанчын і выказацца супраць улады талібаў. Пратэст быў разагнаны стрэламі ў паветра з боку прадстаўнікоў «Талібана».
На мінулым тыдні афганскія жанчыны таксама выходзілі на пратэсты, але 7 верасня падтрымаць іх заклікі да роўнасці і бяспекі выйшлі і мужчыны.
Дэманстранты таксама крычалі лозунгі супраць Пакістана, бо, на іх меркаванне, пакістанскі ўрад падтрымлівае дзейнасць «Талібана», піша ВВС.
ЗША і іншыя краіны ўжо доўгі час абвінавачваюць Пакістан у падтрымцы баевікоў «Талібана». У Афганістане таксама часта гучаць абвінавачванні ў адрас пакістанскага ўраду, які нібыта адыграў важную роль у вяртанні талібаў да ўлады.
У панядзелак з’явіліся непацверджаныя звесткі пра тое, што пакістанскія беспілотнікі былі выкарыстаныя талібамі пры наступленні на афганскую даліну Панджшэр — рэгіён, дзе ўсё яшчэ працягваюцца баі паміж талібамі і сіламі супраціву. Прадстаўнік пакістанскай арміі абвяргае гэтыя абвінавачванні.
