Магчымыя страты з-за санкцый — 1,8 мільярда даляраў. Што будзе з Беларусбанкам?
«Нашай Ніве» стала вядома, як заходнія санкцыі могуць паўплываць на стан Беларусбанка. Апошні квартал банк адпрацаваў са стратамі ў некалькі дзясяткаў мільёнаў даляраў, крэдытныя праекты сыплюцца, замежныя партнёры пагражаюць спагнаннем астранамічнай сумы.
На цяперашні момант пасівы банка складаюць 40 мільярдаў рублёў, з іх каля 8 мільярдаў даляраў валютных сродкаў. Доля знешняга фандзірвання ў валютных пасівах складае 30%, больш за палову з іх — даўгі перад банкаўскімі структурамі ЕС.
Ступень наўпроставай залежнасці банку ад фінансавання рэзідантаў ЕС адносна сціплая: толькі 4% ад усіх пасіваў.
І хаця можа падацца, што гэта мала, насамрэч пытанне трэба разглядаць не з пазіцыі агульнага балансу, а з пазіцыі наяўнасці валюты.
А з ёй сітуацыя такая: праз санкцыі Беларусбанк знаходзіцца пад пагрозай адтоку 1,8 мільярда даляраў. Пакуль партнёры не запатрабавалі датэрміновага пагашэння ранейшых крэдытаў і штрафаў.
Але ў дамовах з замежнымі крэдыторамі (у тым ліку кітайскімі і расійскімі, само сабой і заходнімі) прадугледжаны кавенанты (штрафныя санкцыі) у выпадку, калі банк трапіць пад санкцыі ці вылеціць з міжнародных рэйтынгаў — а гэта ўжо адбылося.
У самым негатыўным сцэнары з банка спагоняць 22% усіх яго валютных пасіваў, гэта наймагутнейшы ўдар па ліквіднасці банка, што можа выклікаць далейшы адток рэсурсаў і кліентаў з банка.
Замежныя банкі адмаўляюцца супрацоўнічаць з Беларусбанкам, гэта б'е па тутэйшых юрыдычных асобах. Выглядае гэта так.
У Беларусі прадпрыемствы не могуць проста так браць крэдыты ў замежных банках, яны маюць гэта рабіць толькі праз мясцовыя банкі.
Пасля ўвядзення санкцый «адвалілася» ўжо 90 мільёнаў крэдытных даляраў для беларускіх вытворцаў, якія меліся паступіць беларускім юрасобам праз Беларусбанк.
Гэта не ўлічваючы завіслую крэдытную лінію на 580 мільёнаў даляраў для «Слаўкалія» — дафінансаваць гэты праект сам Беларусбанк не ў стане, а калі замарозіць, перспектывы ў праекту цмяныя. Нагадаем, кітайцы выдалі крэдыт Гуцэрыеву пад гарантыі ўрада.
Чытайце таксама: Крыніцы: У Гуцэрыева вялікія праблемы — кітайцы замарозілі 580 мільёнаў даляраў на буданіцтва Нежынскага камбіната
Міжнародныя страхавыя кампаніі і замежныя банкі ігнаруюць запыты беларускага боку аб прычынах такога стаўлення і адмаўляюцца ад супрацоўніцтва.
Праблемы з завіслымі плацяжамі кліентаў пакуль не маюць сістэмнага характару — у замежных банках завіслі толькі 4 мільёны даляраў.
Апроч таго, заходнія фінансавыя інстытуцыі адмаўляюцца крэдытаваць Беларусбанк, а расіяне задзіраюць стаўкі і прапануюць браць крэдыты ў расійскіх рублях пад 13,5% гадавых. Для прыкладу, кароткія крэдыты ў расійскіх рублях у Расіі выдаюцца пад стаўку максімум 6,85%.
Крэдыты ў валюце расіяне прапануюць Беларусбанку пад 6,5%.
Разам з гэтым, у банка няма магчымасці купляць валюту ў заходнікаў — даводзіцца купляць у расіян і пераплочваць за пасярэдніцтва.
