У Брэсце другі раз за год па крымінальным артыкуле судзяць 64-гадовую актывістку Алену Гнаўк
У судзе Ленінскага раёна Брэста 2 верасня пачаўся разгляд крымінальнай справы па ч. 1 арт. 368 Крымінальнага кодэкса (абраза прэзідэнта) супраць 64-гадовай брэсцкай актывісткі Алены Гнаўк. У пачатку мая яе асудзілі да двух гадоў хатняй хіміі па «справе карагодаў». У новым выпадку жанчыне пагражае да чатырох гадоў пазбаўлення волі, паведамляе spring96.org.
Згодна з матэрыяламі справы, Алена Гнаўк 20 красавіка, знаходзячыся ў зале Дома правасуддзя ў Брэсце, у ходзе яе допыту ў якасці абвінавачанай у межах іншай крымінальнай справы выказалася фразай, у якой утрымлівалася абраза ў адрас Лукашэнкі.
Як паведаміла сама Алена, памочнік пракурора Аляксей Бараноўскі, які падтрымліваў абвінавачванне на «справе карагодаў», напісаў дакладную запіску на імя пракурора Брэста, у якой засведчыў «нанясенне цяперашняму прэзідэнту Лукашэнку цяжкай абразы, што ўнясе напружанне і дэстабілізацыю ў краіне».
