З выпускнікоў Берасцейшчыны спагналі амаль 500 тысяч рублёў за тое, што яны не адпрацавалі размеркаванне
Больш за 483 тысячы рублёў спагналі з пачатку года з выпускнікоў Брэсцкай вобласці, якія не адпрацавалі размеркаванне, паведамляе Генпракуратура.
За паўгода пракуроры падалі 110 пазоваў. Тыя з іх, якія ўжо паспелі разгледзець суды, задаволены ў поўным аб'ёме, паведамляе ведамства.
Рашэнні, якія ўступілі ў сілу, рэдка выконваліся ў добраахвотным парадку, адзначае пракуратура: даводзілася ініцыяваць спагнанне сродкаў у прымусовым парадку.
Сярод іншага, прадугледжваецца часовае абмежаванне правоў даўжніка на выезд з краіны і кіраванне транспартнымі сродкамі.
У якасці ілюстрацыі прыводзяцца два прыклады.
Дзяўчына тры гады вучылася ў прафесійным ліцэі на кухара-кандытара. Аднак да месца работы дзяўчына не прыбыла. Паводле разліку выдаткі за час яе навучання ў ліцэі склалі больш за 13,9 тыс. рублёў, якія спагнаў суд.
Іншая дзяўчына прыступіла да працы па размеркаванні, аднак праз 2 месяцы яе звольнілі за прагулы без паважных прычын. У судовым парадку з яе спагналі 10 тысяч рублёў.