«Вас збіраюцца запісаць, будзьце асцярожней». Выкладчык БДЭУ сышоў з універсітэта пасля даносу студэнта
Выкладчык факультэта права БДЭУ, дацэнт кафедры дзяржаўна-прававых дысцыплін Юрый Лазебнік больш не працуе ва ўніверсітэце. Ён вёў курсы па крыміналогіі, крымінальным і крымінальна-выканаўчым праве. Звольніцца дацэнту давялося пасля даносу аднаго са студэнтаў.
Фота bseu.by
У сакавіку і красавіку Юрый Лазебнік выкладаў у групы завочнікаў.
«Я вёў заняткі адкрыта, казаў праўду. Запісалі мяне, хутчэй за ўсё, на лекцыі. Бліжэй да экзамена да мяне падышлі трое студэнтаў, кажуць: вас збіраюцца запісаць, будзе асцярожней, не кажыце лішняга.
14 мая я ехаў на замену. І мяне выклікае дэкан. Пераказвае мне ўсё тое, што я казаў на занятках. «Пішы заяву на звальненне па ўласным жаданні». А я днямі прайшоў толькі допуск на працягненне кантракта, ён у мяне да 19 мая быў», — распавядае дацэнт.
Заяву выкладчык у выніку напісаў. 17 мая яму аддалі ўсе яго дакументы і развіталіся.
Юрый Лазебнік — кандыдат юрыдычных навук. Больш за 30 гадоў ён выкладаў у ВНУ. Спачатку ў Акадэміі МУС, потым у Акадэміі кіравання. З 2009 года перайшоў у БДЭУ.
Пасля звальнення дацэнт працу яшчэ не шукаў.
«А куды ўладкуешся? Сяджу дома з жонкай», — усміхаецца выкладчык.