Фільм «Кураж» ідзе ў нямецкім пракаце. Яго глядзяць разам з беларускімі палітвязнямі
Пасля публічнай прэм’еры «Куража» на Берлінале фільм пра беларускія пратэсты выйшаў у нямецкі пракат. Рэжысёр карціны Аляксей Палуян працягвае ладзіць на паказах акцыі салідарнасці з беларускімі палітвязнямі.
Упершыню такая акцыя адбылася на Берлінскім міжнародным кінафестывалі. Яе сутнасць у тым, што глядач знаходзіць на сваім крэсле картачку палітвязня і як бы разам з гэтым чалавекам, што фізічна не можа прысутнічаць на сеансе, глядзіць фільм.
«Гэта спакойная акцыя, без слоў — усё па-беларуску», — каментаваў Аляксей Палуян. 1 ліпеня «Кураж» выйшаў у пракат у Германіі, дзе папярэдне мае быць паказаны прынамсі ў дваццаці пяці гарадах.
Падчас гэтых паказаў рэжысёр працягвае ладзіць акцыі салідарнасці з беларускімі палітвязнямі — яны ўжо адбыліся ў Брэмене, Дзюсельдорфе, Франкфурце і Касэлі. «Наперадзе дзясяткі іншых гарадоў!» — абяцае Аляксей.
У канцы чэрвеня фільм сталі паказваць на вялікіх экранах Аўстрыі. Публічная прэм’ера «Куража» на Берлінале адбылася 11 чэрвеня.