«З табой, Марыя, пабудуем новую Беларусь!» Арцыбіскуп Кандрусевіч правёў у Будславе імшу
Увечары 2 ліпеня арцыбіскуп Тадэвуш Кандрусевіч узначаліў у Будславе імшу для пілігрымаў, паведамляе catholic.by.
catholic.by
На імшы прысутнічалі некалькі тысяч вернікаў, а разам з Тадэвушам Кандрусевічам цэлебравалі імшу біскупы Алег Буткевіч, Казімір Велікаселец, Юрый Касабуцкі, апостальскі візітатар для беларускіх грэка-католікаў архімандрыт Сяргей Гаек, некалькі дзясяткаў святароў з усіх дыяцэзій Беларусі і з некалькіх манаскіх супольнасцяў.
«Сёння ля падножжа Апякункі Беларусі Маці Божай Будслаўскай мы просім Яе апекі для Касцёла ў нашай краіне, для нас саміх і нашай Бацькаўшчыны, якая перажывае складаны час пандэміі каранавірусу і грамадска-палітычнага крызісу. Да іх нечакана далучыўся пажар Будслаўскага санктуарыя», — зазначыў арцыбіскуп Тадэвуш Кандрусевіч. Ён нагадаў, што Бог заклікае людзей давяраць Яму і Ягонай любові.
Сваю прамову арцыбіскуп Кандрусевіч завяршыў кароткім малітоўным заклікам да Багародзіцы: «Марыя, у гэты лёсавызначальны час нашай гісторыі выпрасі нам ласку даверу бязмежнай Божай любові, міласэрнасці і Божаму Провіду <…>. З табой, Марыя, пойдзем у новае заўтра! З табой сумесна адбудуем прысвечаную Табе Будслаўскую святыню! З Табой пабудуем новую шчаслівую Беларусь!»
