Ва Украіне адмянілі пошліны супраць беларускага аўтапрама
Акруговы адміністрацыйны суд Кіева прыпыніў дзеянне ахоўных пошлін, уведзеных рашэннем украінскай Міжведамаснай камісіяй па міжнародным гандлі супраць грузавога аўтатранспарту з Беларусі, піша Європейська правда.
Нагадаем, украінская Міжведамасная камісія па міжнародным гандлі вырашыла ўжыць меру ў выглядзе спецыяльнай пошліны на ўзроўні 35% адносна імпарту ва Украіну аўтобусаў, тралейбусаў, грузавых аўтамабіляў, самазвалаў, аўтамабіляў спецыяльнага прызначэння паходжаннем з Беларусі агульным коштам каля 100 млн даляраў у год. Рашэнне ўступіла ў сілу 22 красавіка.
У адказ Беларусь у маі ўвяла рэжым спецрэгулявання ў дачыненні да шэрагу артыкулаў украінскага імпарту. Паводле слоў бізнэсу, дэ-факта гэта азначае забарону экспарту такіх тавараў у Беларусь.
Калі сітуацыя з украінскім экспартам у Беларусі застаецца складанай, то беларускія вытворцы змаглі дамагчыся часовай адмены дзеяння ахоўных пошлін.
Акруговы адміністрацыйны суд Кіева — скандальны суд з дрэннай рэпутацыяй, які часта выносіў неардынарныя рашэнні. Прэзідэнт Украіны Уладзімір Зяленскі заяўляў аб сваім намеры ліквідаваць гэты суд.
