Палата прадстаўнікоў Кангрэса ЗША прагаласавала за імпічмент Трампа. Цяпер слова за Сенатам
Палата прадстаўнікоў Кангрэса ЗША ў сераду ўхваліла рэзалюцыю аб імпічменце дзейнага прэзідэнта Дональда Трампа, паведамляюць інфармагенцтвы.
Артыкул абвінавачвання ў прынятым ніжняй палатай дакуменце адзін — падбухторванне да мяцяжу.
Паводле вынікаў галасавання, рэзалюцыю аб імпічменце падтрымалі не менш за 10 аднапартыйцаў Трампа ў Палаце прадстаўнікоў.
Цяпер абвінаваўчае заключэнне павінна быць перададзена ў Сенат, дзе працэдура ператворыцца ў судовы працэс. Аднак, згодна з графікам працы верхняй палаты заканадаўчага органа, яна можа заняцца пытаннем імпічменту ўжо пасля заканчэння прэзідэнцкага тэрміну Трампа: Сенат не будзе збірацца для абмеркавання якіх-небудзь сур'ёзных тэм, якія патрабуюць галасавання, да 19 студзеня, а інаўгурацыя новага прэзідэнта ЗША Джозэфа Байдэна пройдзе апоўдні 20 студзеня.